Ana Shirya makarkashiya a fadar Shugaban kasa domin ganin Tunubu ya fadi zabe – Elrufa’i.
Gwamnan jihar Kaduna, Nasir El-Rufai ya bayyana cewa wasu jami’an gwamnatin tarayya a fadar Aso Rock Villa na kokarin tada zaune tsaye a kan nasarar da dan takarar shugaban kasa na jam’iyyar APC Bola Tinubu, zai samu a zaben watan nan.
El-Rufai ya bayyana hakan ne yayin wata tattaunawa da gidan talabijin na Channels TV’s Sunrise Daily a ranar Laraba.
Ya ce, “Na yi imanin akwai wasu abubuwa a cikin Villa da ke son mu fadi zabe saboda ba su samu ba; suna da dan takararsu. Dan takararsu bai ci zaben fidda gwani ba,” in ji El-Rufai.
A cewar gwamnan Kaduna, wadanda ke adawa da nasarar Tinubu su ne mutanen da Tinubu ya kayar da ’yan takararsu na shugaban kasa a zaben fidda gwani na shugaban kasa na jam’iyyar a bara.
El-Rufai ya ce makiyan Tinubu da ake zargin sun fake ne a karkashin manufofin shugaban kasa Muhammadu Buhari don dakile nasarar da tsohon gwamnan jihar Legas ya samu a zaben watan nan.
Ya ce, “Suna kokarin ganin mun fadi zabe ne, kuma suna fakewa da burin shugaban kasa na yin abin da yake ganin ya dace. Zan ba da misali guda biyu: wannan tallafin man fetur da ake kashewa kasar tiriliyoyin Naira, wani abu ne da muka amince a cire.
“A gaskiya, na yi tattaunawa da shugaban kasa na nuna masa dalilin da ya sa ya tafi. Domin ta yaya za ku iya samun babban kasafin kudi na N200b na titunan tarayya sannan ku kashe Naira Tiriliyan 2 wajen tallafin man fetur? Wannan tattaunawa ce da na yi da shugaban kasa a shekarar 2021 lokacin da abin tallafin ya fara tashi. Ya gamsu. Mun tafi. Ya canza. Kowa a cikin gwamnati ya yarda, kuma ya canza.
“Misali na biyu da zan bayar shine sake fasalin kudin. Dole ne ku fahimci shugaban. Jama’a suna zargin Gwamnan Babban Bankin ne da laifin sake fasalin kudin, amma a’a sai dai ku koma ku kalli ficewar Buhari a matsayin shugaban kasa na farko.
“Ya yi wannan; gwamnatin Buhari da Idiagbon sun canza mana kudin mu kuma sun yi su a asirce da nufin kamo wadanda ke wawure kudaden haram. Niyya ce mai kyau. Shugaban kasa yana da hakkinsa. Amma yin hakan a wannan lokaci a cikin lokacin da aka ba shi ba ya da wata ma’ana ta siyasa ko tattalin arziki.”
Daga Rufa’i Abdurrazak Bello Rogo
