Ku maida hankali don inganta rayuwar Al’umma ba gina gadar Sama ba- Buhari ga gwamnoni.
Gwamnatin Shugaba Muhammadu Buhari ta dora alhakin tsananin talauci da ake fama da shi a kasar nan a kan gazawar gwamnatocin Jihohin kasar nan wajen ba da gudummawar kason su na ayyukan cigaba ga tun asali inda ake gudanar da manyan ayyukan noma.
Karamin Ministan Kasafin Kudi da Tsare-Tsare na Kasa, Clement Agba, ne ya bayyana haka ga manema labarai a fadar shugaban kasa bayan taron majalisar zartarwa ta tarayya na mako wanda shugaban kasa Muhammadu Buhari ya jagoranta a fadar shugaban kasa da ke Abuja.
Agba ya mayar da martani ne ga wata tambaya inda ya bukaci sanin abin da shi da takwarar sa ministar kudi, kasafin kudi da tsare-tsare ta kasa, Zainab Ahmed suke yi domin magance matsalar cizon sauro da galibin ‘yan Najeriya ke fuskanta a halin yanzu.
Ministan, wanda ya yi yunkurin karyata ra’ayin cewa hauhawar yunwa da rashi ya zama ruwan dare ga Najeriya, ya bayyana cewa Gwamnatin Tarayya ta hanyar shirye-shiryenta da dama, na sadaukar da kayan aiki domin rage wahalhalun da jama’a ke fama da su, amma ya lura cewa gwamnatocin Jihohi da suka kasance suna karbar kasonsu na dukiyar kasa, sun kasance suna karkatar da albarkatun zuwa ayyukan da kusan ba su da wani tasiri kai tsaye ga bukatun jama’a.
Ya yi nuni da cewa kashi 72 cikin 100 na talaucin da ake fama da shi a Najeriya ana samunsa ne a yankunan karkara, wanda a cewarsa gwamnoni sun yi watsi da su, inda ya ce shuwagabannin jihohi sun fi son yin aiki a manyan jihohin kasar nan.
Ya koka da yadda gwamnonin jihohin ke mayar da hankali wajen gina gadar sama da filayen jiragen sama da sauran ayyuka da ake iya gani a manyan biranen jihohi maimakon saka hannun jari a wuraren da ke inganta rayuwar al’umma kai tsaye a yankunan karkara.
Agba ya yi nuni da cewa, a yayin da jihohi ke kula da filaye domin noma, ba sa saka hannun jari a cikinsu domin amfanin al’ummarsu na karkara.
Ya shawarci Gwamnonin da cewa maimakon mayar da hankali wajen gina gadar sama da gadoji, ya kamata su mai da hankali kan ayyukan da za su iya fitar da mafi yawan jama’a daga kangin talauci.
Rahoto Kamal Aliyu Sabongida.
