Rikici Ya Kaure: Amarya Ta Farmaki Ango da Naushi a Ranar Daurin Aure.
Bidiyon wani bikin aure da aka yi a Rwanda ya nuno amarya da ango suna tafiya hannunsu cikin juna kafin dirama ya kaure
Kwatsam matar ta kunsawa mutumin naushin bazata yayin da jama’ar da ke wajen suka gaggauta shiga tsakani
Wasu masu amfani da soshiyal midiya sun nuna takaicinsu kan lamarin yayin da wasu ke mamakin ko dai shiri ne
Rigima ya kaure a wajen wani bikin aure bayan amarya ta farfmaki ango a wajen shagalin biki a Rwanda.
Bidiyo shagalin bikin ya nuno amarya da ango suna fita daga wani katafaren gini kafin tunkarar coci don daurin aurensu.
Angon ya sanya kwat da wando yayin da amaryar ta sanya farar doguwar riga irin na amare. Kawayen amarya da abokan ango sun jeru sanye da anko iri guda.
Komai na ta tafiya daidai har sai da amarya ta tubure.
Masoyan sun rike hannu yayin da amaryar ke rike da fure. Kwatsam sai ta saki hannun angon sannan ta kwashe shi da mari ta keya.
Sai ta jefar da furen sannan ta tattara rigarta ta yi shirin fada, kafin aminin ango ya yi gaggawan shiga tsakani.
Aminin angon da sauran kawayen amaryar sun yi tsalle don rirriketa, yayin da take kokarin sake farmakar angon nata.
Sun sha fama a kokarinsu na lallashin matar wacce aka kwantar a kasa. An gano wasu daga cikin kawayen amaryar suna kuka.
Daga bisani, an gano amaryar tana magana da wata mata a kan wayar tarho cikin harshen Kinyarwanda.
Jama’a sun yi martani
Shallot Ruth:
“Bakin ciki ya da baibaye ni. Na kasa rike hawayena.”
Annet Queen: ‘
“Wannan gaskiya ne ko dai shirin fim.”
Dativa Joachim:
“Shirin fim ne.”
Nzigiyabagabo Theoneste:
“A ko da yaushe aure na fuskantar makiya da dama.”
CM:
“Wannan talla ne.”
Rahoto Zuhair Ali Ibrahim