Yan Sandar Najeriya sun yi barazanar kauracewa zaben gwamnoni.
Yan sandan Najeriya sun yi tururuwa, sun yi barazanar kauracewa zaben gwamna da ‘yan majalisar dokoki kan rashin biyansu alawus-alawus din zaben shugaban kasa.
Wasu daga cikin jami’an da suka zanta da SaharaReporters sun ce alkawarin da aka masu shi ne za’a biya su kafin zabe amma sun yi mamakin yadda har yanzu ba’a biya su albashi ba.
Sun kuma yi barazanar kauracewa zaben gwamnoni da na ‘yan majalisar jiha da za’a yi ranar 11 ga watan Maris.
Jami’an sun ce sun yi amfani da nasu kudaden ne a duk lokacin zaben suna tsammanin za’a mayar musu da kudaden su.
“Jami’an ‘yan sandan Najeriya suna fama da matsalar albashi. tunaninsu, bayan sun yi aiki tukuru don zaben, ‘yan sanda suna da damar karbar Naira 150,000 na alawus-alawus din zabe amma ba su samu kudi ba,” wata Sufeton ‘yan sandan ta shaida wa SaharaReporters ranar Juma’a.
“Wadanda suka karba; kadan daga cikin su ne suka samu N35,000. Don Allah a kawo mana agaji, mu ’yan sanda muna aiki amma muna shan wahala ta fuskar albashi. Da fatan za’a gaya wa IGP (Sufeto Janar na ‘yan sanda) ya biya mana kuɗin mu. Hatta bashin da shugaban kasa ya sanya mana ba a biya mu ba.”
Wani dan sandan da ya fusata da yake aiki a rundunar ‘yan sanda a yankin Kudu maso Gabashin Najeriya ya ce, “Ni sifeto ne na ‘yan sanda da ke aiki a jihar Imo. Na san sau da yawa kuna fada ta hanyar buga jaridu don hukumar ‘yan sanda ta biya bashin watanni shida amma duk abin ya ci tura.
“A wannan karon, alawus-alawus din zaben shugaban kasa wani abu ne da ke sa mu cikin damuwa. Wasu zababbun ma’aikatan sun karbi alawus-alawus dinsu. Yayin da yawancin mu, musamman wadanda ke karbar albashi daga bankin ‘yan sandan Najeriya, ba’a biya su ba.
“Har wala yau, ba’a bayar da wani dalili ba. Kudin alawus din N35,000 ne. Sauran bankuna sun biya kafin babban zabe. Da yawa daga cikinmu ba su samu ba a fadin kasar. Bankin karamin kudi na ‘yan sandan Najeriya bai biya kudin ba. Har suna bata wa duk wanda yake karbar albashi a banki da rashin aikin da yake yi, “Ba sa biyan albashi a kan lokaci, ko da sun biya, mutum ba zai iya samun kudin ba. Canja wurin ba ya aiki, ATMs ba sa aiki, babu tsabar kudi, muna shan wahala.”
